8 × 11 jaor Aad Prinse Klub

Greuts gaeve veer te kinne det veer de Aad Prinse Klub van D’n Uul kómmend vastelaovessezoen 8 x 11 jaor besjtaon. Twee jaor nao ‘n fantastisch jubeleijemsezoen van oos moderverening D’n Uul, is ‘t noe de beurt aan ós; de Aad Prinse Klub van D’n Uul. Veer es Aad Prinse hechte aan anonimiteit en etiquette zo wie zich det heurt! Daoróm zólt geer ós ouch zelje op de veurgróndj zeen of örges taegekómme. ‘t Oetdrage van de vastelaovend, en dae van D’n Uul en Remunj in ‘t bezónjer doon veer dan ouch dök van achter de sjirme. Aevel wille veer deze mielpaol neet ónopgemerk veurbie laote gaon. Daoróm gaeve veer uch hiemit de gelaegeheid ós perseunlik te kómme fillesetere en same mit ós ‘n glaas beer te drinke. Zo wie geer ós kint zal dit gein normale resepsie waere mer ‘ne feesmiddaag / aovend mit meziek en ‘t leefs heel väöl sjaele wazel. Veer höffe gaer ‘t glaas mit uch op zaoterdaag 21 november vanaaf 16:00 oer in t Witte Kirkske in de Veursjtad van Remunj. Eur presentie is oos grótste kedo mer wilt geer toch neet mit laeg henj kómme, zólle veer ’t meer dan sjoon vinje es geer get veur kint drage of ‘n sjtökske meziek te geheure kint bringe waat uch verbinjt mit de Aad Prinse van groot Remunj. Immers, vastelaovend make veer same! Veer sjpitse ós drop óm uch te verwilkómme! Names de Aad Prinse Klub D’n Uul Remunj, Allaar I, Prizzedent en Hans IV, Sjriever